[转帖] [轉貼]坑渠下的女人
<div id="text210159"><div id="tpid210159"><div id="spid210159">落雨等車，大家一定試過，落雨時撞鬼大家又有冇試過？阿良就係因為一場大雨，而同一隻枉死o既女鬼發生「第三類」接觸。<br/><br/>由於突然掛起黑色暴雨警告訊號，令阿良唔使返學。不過佢知道停課o個陣已經o係返學途中，所以唯有中途轉車返屋企。當去到巴士站等車o既時候，阿良突然聽到身邊有一陣「咕嚕、咕嚕」o既怪聲。阿良好奇咁望o黎望去，終於搵到聲音o既來源，原來係o黎自巴士站旁邊o既地下坑渠口。佢一時無聊伸過頭過去，發現坑渠入面有好多水泡，就好似一煲滾緊o既水咁，水泡唔停咁係入面湧緊出o黎。<br/><br/>「原來係水聲！」阿良自言自語。不過佢講完呢句話之後，身邊o既一排坑渠蓋突然同時發出「o拍」一聲，然後一整排大約五個坑渠蓋竟然同一時間彈起離地約成層樓咁高，之後就一齊跌返原位。阿良俾呢個突如其來o既情景嚇到眼定定，腳都軟埋，差o的企都企唔穩，但又忍唔住好奇心，再望向噴射完o既坑渠。<br/><br/>當阿良望向坑渠裡面時，佢竟然見到水裡面出現一個女人。個女人上半身o係水入面不斷掙扎、載浮載沉，個樣好似好辛苦咁。突然間佢好似知道阿良見到佢咁，於是一面大叫「救命！救我呀！」，一面盡量伸出佢隻手，好似好想阿良扯佢上o黎咁。<br/><br/>「點解會有人o係坑渠入面？唔通頭先有人跌o左落坑渠入面？」阿良抬起頭諗住叫人幫手拉個女人上o黎，可惜巴士站除o左佢自己之外，一個人都冇。回頭再望返坑渠入面時，個女人已經唔見o左。<br/><br/>「唔係話？唔通眼花？」阿良揉一揉眼睛再望，依然見唔到個女人。咁係呢個時候巴士o黎到，阿良唯有即刻上車。不過成個車程入面，阿良腦海中依然不斷浮現坑渠裡面o個個女人o既樣。<br/><br/>直到夜晚，唔知係日有所思定真係個女人顯靈，阿良o係夢中又見佢。個女人依然o係度不斷掙扎，狂叫救命，好想阿良救佢出o黎。<br/><br/>「救我呀！」坑渠裡面o既女人狂叫。<br/><br/>「我點救你呀？」阿良問個女人。<br/><br/>「你去海邊！去到海邊你就會見到我。你一定要救我呀！冇人知我出o左事！屋企人會擔心我！」個女人不斷強調。<br/><br/>「咁你想我點救你呀？」阿良再問個女人。<br/><br/>「你聽日先去碼頭，到時你會見到一對紅色鞋，你即刻執起佢然後拋落海，跟住你就會見到我o既屍體。」<br/><br/>第二日，阿良一起身就去到碼頭，不過搵o黎搵去都見唔o個對紅色鞋。直至去到碼頭o既一個花糟旁邊，終於見到對紅鞋。阿良執起對紅色鞋之後就即刻將佢掉落海。突然間佢見到碼頭對開o既海面有一件好大o既物體載浮載沉，望真o的先發覺呢件物體原來係一個人，所以即刻報警。<br/><br/>經水警打撈，發覺海上飄浮o既原來真係一具女屍，估計死o左大約四至五日。雖然面目已經俾水浸到發腫，但係由佢上半身o既衣著隱約可以認得出係坑渠裡面o既女人。去完警署落口供之後，阿良o係搭車返屋企途中睡著o左。o係夢中佢又再見到坑渠裡面o既女人，個女人仲同佢講o左好多o野。<br/><br/>「多謝你！」坑渠裡面o既女人講。<br/><br/>「點解你會死？」阿良問。<br/><br/>「你記唔記得第一次o係坑渠裡面見到我？我就係o係o個日朝早行經一條引水道o既時候突然俾洪水沖o左落引水道浸死。但係我唔可以死o左都冇人知，所以我先不斷o係引水道到大海途中o既坑渠出現，希望有人見到我、救到我。我真係唔想嚇親你！不過我而家終於都可以安息喇！再見！」坑渠裡面o既女人講完之後就消失o左，而阿良就突然間紮醒。<br/><br/>發生呢件事之後，阿良以後每逢經過坑渠口，都會下意識咁望o下坑渠入面會唔會再見到o個個女人。</div></div></div><br style="CLEAR: both;"/> 咁得人驚咖.......
页:
[1]